مقبوضہ بلوچستان میں پاکستان کی نئی عسکری حکمت عملی – نادر بلوچ

مقبوضہ بلوچستان میں پاکستان کی نئی عسکری حکمت عملی – نادر بلوچ

تحریر : نادر بلوچ

بلوچستان کی موجودہ سیاسی، اقتصادی اور عسکری صورتحال ایک ایسے نازک موڑ پر پہنچ چکی ہے جہاں ریاستی عسکری حکمتِ عملی، بیرونی سرمایہ کاری کا تحفظ، اور بلوچ مزاحمت کاروں کی بڑھتی ہوئی کارروائیاں ایک دوسرے کے آمنے سامنے کھڑی ہیں۔ پاکستان کی جانب سے بلوچستان کے وسائل کو بیرونی کمپنیوں کے سپرد کرنے اور سیکیورٹی کو یقینی بنانے کے لیے اٹھائے گئے حالیہ اقدامات نے خطے میں تناؤ کو مزید ہوا دی ہے۔ تیزی سے بدلتے ہوئے حالات، سیکیورٹی کی نئی صف بندیوں، بلوچ قوم کے وسائل پر بیرونی طاقتوں کے مدد سے قبضے کی کوششوں، اور سی پیک کی ناکامی کے بعد صورتحال مزید گھمبیر ہوتی جارہی ہے۔

مئی 2026 میں حکومتِ پاکستان اور مقتدرہ نے عسکری انفراسٹرکچر میں ایک بڑی تبدیلی کرتے ہوئے فرنٹیئر کور (FC) بلوچستان کے دائرہ اختیار کو وسیع کرنے اور ایک نئے ہیڈ کوارٹر ایف سی بلوچستان (ویسٹ) قائم کرنے کی منظوری دی ہے۔ اس سے قبل ایف سی صرف نارتھ (کوئٹہ) اور ساؤتھ (تربت) کے کمانڈ اسٹرکچر کے تحت کام کر رہی تھی۔ اس نئی فورس کا بنیادی مقصد ایران اور افغانستان سے متصل مغربی اضلاع بالخصوص چاغی، نوشکی، اور واشک کے مائننگ کوریڈورز (خام مال کی نکالنے کی راہداریوں) کو مستقل فوجی تحفظ فراہم کرنا ہے۔پالیسی میں تبدیلی اور ایف سی ویسٹ کا قیام اس بات کا کھلا اعتراف ہے کہ سابقہ سیکیورٹی ماڈل بلوچ مزاحمت کاروں کی گوریلا اور مربوط کارروائیوں کو روکنے میں ناکام ہو چکا ہے اور اب مائننگ سائٹس کو "ملٹری زونز” (فوجی چھاؤنیوں) میں تبدیل کیا جا رہا ہے۔ چاغی سے بلوچ قومی وسائل کی لوٹ مار اور بیرونی سرمایہ داروں کو یقین دہانیاں کی گئی ہیں۔ چاغی کو قدرت نے تانبے اور سونے کے دنیا کے عظیم ترین ذخائر (ریکوڈک اور سیندک) سے نوازا ہے، لیکن ستم ظریفی یہ ہے کہ طویل غلامی کی وجہ سے چاغی کے مقامی بلوچ خط غربت سے نیچے اور بنیادی ترین انسانی سہولیات (پینے کے صاف پانی اور صحت) سے محروم ہیں۔ کینیڈین کمپنی بیرک گولڈ (Barrick Gold) جو ریکوڈک منصوبے پر کام کر رہی ہے، نے خطے میں خراب امن و امان کی وجہ سے مائیننگ سرگرمیوں کو سست کرنے اور نظرثانی کرنے کا اعلان کیا تھا۔ اس دباؤ کے بعد پاکستانی مقتدرہ نے اسپیشل انویسٹمنٹ فیسیلیٹیشن کونسل اور منرل انویسٹمنٹ فیسیلیٹیشن اتھارٹی کے ذریعے اربوں روپے صرف سیکیورٹی کے نام پر مختص کیے ہیں۔

مقامی آبادی کی بیدخلی اور انسانی حقوق کی پامالیاں شددت کے ساتھ جاری ہیں۔ سرمایہ کاروں کو محفوظ ماحول دینے کے نام پر چاغی اور مضافاتی علاقوں کو شدید ملٹریائز کیا جا رہا ہے۔ سول سوسائٹی اور انسانی حقوق کی تنظیموں کے مطابق، ان مائننگ پراجیکٹس کے گرد باڑ لگانے، مقامی لوگوں کی نقل و حرکت محدود کرنے، جبری گمشدگیوں اور ماورائے عدالت قتل کے واقعات میں خوفناک حد تک اضافہ ہوا ہے۔ بلوچ قوم پرست اس پورے عمل کو قومی وسائل کی کھلی لوٹ مار اور مقامی آبادی کو بے دخل کرنے کی نوآبادیاتی پالیسی قرار دیتے ہیں۔

بلوچ مزاحمت کاروں کی بڑھتی ہوئی مربوط کارروائیاں شدت اور جدت کے ساتھ اضافہ ہورہا ہے۔ حالیہ مہینوں میں بلوچ مسلح تنظیموں کی حکمتِ عملی میں ایک بڑی تزویراتی تبدیلی دیکھی گئی ہے۔ اب یہ کارروائیاں صرف روایتی گوریلا کارواہیوں تک محدود نہیں رہیں بلکہ انتہائی مربوط، طویل اور بڑے پیمانے کے گاتک حملوں کی شکل اختیار کر چکی ہیں۔ جنوری 2026 میں بلوچستان کے 13 اضلاع میں بیک وقت کیے گئے مربوط حملوں اور اپریل 2026 میں چاغی کے علاقے دارگوان میں تانبے اور سونے کے پراجیکٹ پر ہونے والے حملے (جس میں غیر ملکی ماہرین بھی نشانہ بنے) نے فوجی حکمرانوں کے سیکیورٹی دعووں کی قلعی کھول دی۔بلوچستان کو پاکستان سے آزاد کرنے کے لئے متحرک مسلح مزاحمت کاروں نے اب اپنا رخ براہِ راست ان کمپنیوں اور انفراسٹرکچر کی طرف موڑ دیا ہے جو ان کے بقول بلوچ وطن کے وسائل کا استحصال کر رہی ہیں۔ مائیننگ کمپنیوں کی ہیوی مشینری کو جلانا، سپلائی لائنز کو معطل کرنا اور غیر ملکی عملے کو نشانہ بنانا ان کی نئی جنگی حکمتِ عملی کا حصہ بن چکا ہے۔ جبکہ ان کارواہیوں کی وجہ سے چین پاکستان اقتصادی راہداری (CPEC) کا ناکامی کی طرف سفر اختتام پزیر ہوچکا ہے۔
سی پیک کو پاکستان کے لیے "گیم چینجر” اور بلوچستان کی تقدیر بدلنے کا منصوبہ بنا کر پیش کیا گیا تھا، لیکن آج یہ منصوبہ اپنے منطقی انجام یعنی شدید ترین سست روی اور ناکامی کی طرف بڑھ رہا ہے۔ سی پیک بناتے وقت پاکستانی حکمرانوں کا دعوای تھا کہ گوادر بندرگاہ دنیا کا بڑا تجارتی مرکز بنے گا۔ موجودہ تلخ حقیقت یہ ہے کہ گوادر سخت سیکیورٹی حصار میں جکڑا ایک شہر ہے جہاں مقامی ماہی گیر روزگار کے لیے ترس رہے ہیں اور بحری تجارت نہ ہونے کے برابر ہے۔ چینی انجینئرز پر مسلسل خودکش حملوں (جیسے حالیہ برسوں میں کراچی، تربت اور مچھ میں ہوئے) کے بعد چین نے اپنے شہریوں کی سیکیورٹی پر گہرے تحفظات کا اظہار کیا ہے اور مزید فنڈنگ روک دی ہے۔ علاقائی خوشحالی کی باتیں ہوئیں، بلوچ عوام کو روزگار ملے گا۔ نوکریوں میں بلوچوں کو نظر انداز کیا گیا۔ سی پیک کی ناکامی کی سب سے بڑی وجہ یہ ہے کہ اس منصوبے میں مقامی بلوچ عوام کی شمولیت اور ان کی مرضی شامل نہیں تھی۔ اسے وفاق کی طرف سے طاقت کے بل بوتے پر نافذ کرنے کی کوشش کی گئی، جس کے نتیجے میں گوادر سمیت پورا مکران کوسٹل ہائی وے ایک جنگی زون کا منظر پیش کر رہا ہے۔

مقبوضہ بلوچستان میں پاکستان کی نئی سیکیورٹی حکمتِ عملی چاہے وہ ایف سی ویسٹ کا قیام ہو یا بیرونی سرمایہ کاروں کے لیے خصوصی فوجی دستے مسئلے کا پائیدار حل فراہم کرنے میں ناکام نظر آتی ہے۔ تاریخ گواہ ہے کہ محض بندوق کے زور پر مقامی آبادی کو کچل کر وسائل کی نکالنے کا عمل طویل عرصے تک جاری نہیں رکھا جا سکتا۔ سعودی عرب کی کمپنی ‘منارا منرلز’ کا حالیہ دنوں میں سیکیورٹی خدشات کی بنا پر سرمایہ کاری سے پیچھے ہٹنا اور بیرک گولڈ کا کام سست کرنا اس بات کا واضح ثبوت ہے کہ سرمایہ دار وہاں کا رخ نہیں کرتے جہاں مقامی آبادی کی مرضی شامل نہ ہو اور زمین سلگ رہی ہو۔ جب تک بلوچستان کے سیاسی مسئلے کو تسلیم کر کے بلوچ عوام کے حقِ خودارادیت اور ان کے وسائل پر ان کے حقِ ملکیت کو تسلیم نہیں کیا جاتا، یہ خطہ اسی طرح عدم استحکام کا شکار رہے گا، اور کوئی بھی بیرونی کوریڈور یا مائننگ پراجیکٹ یہاں کامیاب نہیں ہو پائے گا۔