کوئٹہ پریس کلب کے سامنے جبری گمشدگیوں کے خلاف وی بی ایم پی کا احتجاجی کیمپ 6189ویں روز جاری رہا

کوئٹہ پریس کلب کے سامنے جبری گمشدگیوں کے خلاف وی بی ایم پی کا احتجاجی کیمپ 6189ویں روز جاری رہا

اس دوران مختلف مکاتب فکر سے تعلق رکھنے والے افراد نے احتجاجی کیمپ کا دورہ کیا، اور لاپتہ افراد کی لواحقین سے اظہار یکجہتی کیا

اس موقع پر وی بی ایم پی کے چیئرمین نصراللہ بلوچ نے گفتگو کرتے ہوئے کہا کہ وائس فار بلوچ مسنگ پرسنز گزشتہ سترہ برسوں سے جبری گمشدگیوں کے مسئلے کے حل کے لیے ایک طویل، پرامن اور آئینی جدوجہد جاری رکھے ہوئے ہے۔ تنظیم کا مؤقف ہمیشہ یہ رہا ہے کہ ہر شہری کو قانون، آئین اور بین الاقوامی انسانی حقوق کے اصولوں کے مطابق تحفظ اور انصاف فراہم کیا جائے۔

انہوں نے کہا کہ جبری گمشدگیاں نہ صرف بنیادی انسانی حقوق کی خلاف ورزی ہیں بلکہ قانون کی حکمرانی اور انصاف کے تقاضوں سے بھی متصادم ہیں۔ ریاستی اداروں کی ذمہ داری ہے کہ اگر کسی فرد پر کوئی الزام ہے تو اسے قانون کے مطابق گرفتار کرکے عدالت کے سامنے پیش کیا جائے اور اسے منصفانہ قانونی عمل کا حق دیا جائے۔

نصراللہ بلوچ نے مطالبہ کیا کہ تمام جبری لاپتہ افراد کو فوری طور پر بازیاب کیا جائے، لاپتہ افراد کے اہل خانہ کو درپیش بے یقینی اور اذیت کا خاتمہ کیا جائے، اور جبری گمشدگیوں کے تمام واقعات کی شفاف اور غیر جانبدارانہ تحقیقات کر کے ذمہ داران کو قانون کے کٹہرے میں لایا جائے۔

انہوں نے کہا کہ وی بی ایم پی اپنی پرامن جدوجہد جاری رکھے گی اور امید کرتی ہے کہ حکومت، عدلیہ، انسانی حقوق کے ادارے اور تمام متعلقہ فریقین اس انسانی مسئلے کے مستقل اور منصفانہ حل کے لیے مؤثر اقدامات کریں گے۔