2 کمسن طالبات اور 50 سالہ شخص کی جبری گمشدگی کی شدید مذمت ، فوری رہائی کا مطالبہ۔ بی ڈبلیو ایف

بلوچ وومن فورم نے ضلع کیچ کے علاقے سنگ آباد کرکی سے اپنے گھر سے پاکستانی فورسز کی جانب سے جبری طور پر لاپتہ کی جانے والی 17 سالہ شہناز، 14 سالہ شراناز اور 50 سالہ عارف عیسیٰ کی ماورائے عدالت تحویل اور جبری گمشدگی کی سخت الفاظ میں مذمت کی ہے۔

تنظیم کی جانب سے جاری کردہ پریس ریلیز کے مطابق، دونوں کمسن لڑکیوں، شہناز اور شراناز، کا تعلق طالب علم طبقات سے ہے اور وہ اس سے قبل بھی جبری گمشدگی کا شکار رہ چکی ہیں۔

بیان میں کہا گیا ہے کہ کمسن بچوں اور طالبات کو بار بار اغوا کرنا ان کے بنیادی انسانی حقوق کی سنگین اور انتہائی تشویشناک خلاف ورزی ہے۔

بلوچ وومن فورم نے اپنے بیان میں واضح کیا کہ ایک والد کے ساتھ دو اسکول جانے والی کمسن لڑکیوں کو ان کے گھر سے غائب کرنا صرف تین افراد پر حملہ نہیں، بلکہ یہ ایک بلوچ خاندان کے تحفظ اور وقار پر براہِ راست حملہ ہے۔ بلوچ خواتین، لڑکیوں بالخصوص طالبات اور نابالغ بچوں کے اغوا میں مسلسل اضافہ جبری گمشدگیوں کے بطورِ ہتھیار استعمال میں ایک خوفناک اور تشویشناک شدت کو ظاہر کرتا ہے۔

بیان میں مزید کہا گیا ہے کہ خاندانوں کو بغیر کسی قانونی جواز، عدالتی نظربانی اور سلامتی کی معلومات کے بغیر ان کے پیاروں سے محروم کیا جا رہا ہے۔ کسی بھی ادارے یا اتھارٹی کو یہ حق حاصل نہیں ہے کہ وہ شہریوں کو قانون کے تحفظ سے محروم کر کے ماورائے عدالت حراست میں رکھے۔

بلوچ وومن فورم نے حکومت اور متعلقہ حکام سے مطالبہ کرتے ہوئے کہا کہ شہناز، شارناز اور عارف عیسیٰ کی موجودگی کے مقام کو فوری طور پر ظاہر کیا جائے اور انہیں بلا مشروط اور محفوظ طریقے سے رہا کیا جائے۔

اگر اداروں کو کسی قسم کا کوئی جرم یا الزام درپیش ہے تو انہیں فوری طور پر ایک خودمختار و بااختیار عدالت کے سامنے پیش کر کے مکمل قانونی دفاع اور شفاف ٹرائل کا حق دیا جائے۔

بین الاقوامی انسانی حقوق کی تنظیمیں اور عالمی ادارے اس کیس پر فوری نوٹس لیں اور بلوچ خواتین، بچوں، طلباء اور خاندانوں کو منظم جبری گمشدگیوں کا نشانہ بنانے کے اس سلسلے کو بند کروانے کے لیے اپنا کردار ادا کریں۔

بلوچ وومن فورم نے زور دیتے ہوئے کہا کہ خواتین اور بچوں کے اس طرح ماورائے عدالت اغوا کو کسی صورت معمول کا عمل نہیں بننے دیا جائے گا اور اس عمل میں ملوث ذمہ دار عناصر کا محاسبہ کیا جانا ضروری ہے۔