8 جون: بلوچ قومی مزاحمت اور اسیرانِ ظلم کا دن۔ بلوچ یکجہتی کمیٹی

8 جون: بلوچ قومی مزاحمت اور اسیرانِ ظلم کا دن۔ بلوچ یکجہتی کمیٹی

بلوچ قوم کے نام

8 جون بلوچ قوم کی تاریخ میں صرف ایک یاد کا دن نہیں بلکہ ایک کھلا سیاسی اعلان ہے کہ ظلم، جبر اور ریاستی تشدد کو بھلایا نہیں جا سکتا اور نہ ہی قبول کیا جا سکتا ہے۔ یہ دن ان ہزاروں بلوچ نوجوانوں، خواتین، بچوں اور بزرگوں کی یاد میں ہے جنہیں ریاستی جبر، جبری گمشدگیوں، غیر قانونی قید، ماورائے عدالت گرفتاریوں اور انسانی وقار کی سنگین پامالیوں کا نشانہ بنایا گیا یہ وہ دن ہے جب ہم اجتماعی طور پر یہ اعلان کرتے ہیں کہ ظلم کو خاموشی سے برداشت کرنا اب ممکن نہیں رہا۔

بیان میں کہا گیا کہ 8 جون مزاحمت، انکار اور تسلسلِ جدوجہد کا اعلان ہے۔ یہ دن ہمیں یاد دلاتا ہے کہ ریاستی جبر کوئی حادثہ نہیں بلکہ ایک منظم سیاسی پالیسی ہے جس کا مقصد بلوچ قوم کو خوف، خاموشی اور تقسیم میں مبتلا رکھنا ہے۔ لیکن تاریخ گواہ ہے کہ جبر جتنا بڑھتا ہے، مزاحمت اتنی ہی گہری ہوتی ہے۔ وہ نوجوان جو قید و بند اور جبری گمشدگی کا شکار ہوئے، وہ آج بھی اپنی قوم کے شعور میں زندہ ہیں۔ ان کی قربانیاں خاموش نہیں بلکہ ایک جاری سیاسی بغاوت کی بنیاد ہیں۔

با وقار شہریوں !

بیان میں مزید کہا ہے کہ بلوچستان میں جبری گمشدگیاں اب کوئی انفرادی یا اتفاقی عمل نہیں رہیں۔ یہ ایک منظم ریاستی ڈھانچے کا حصہ بن چکی ہیں، جس کا مقصد سیاسی اختلاف کو کچلنا، اجتماعی شعور کو توڑنا اور خوف کو بطورِ حکمرانی استعمال کرنا ہے۔ یہ وہ نظام ہے جس میں آواز اٹھانے والوں کو غائب کر دیا جاتا ہے، سوال کرنے والوں کو نشانِ عبرت بنانے کی کوشش کی جاتی ہے، اور پورے معاشرے کو خاموش رہنے پر مجبور کیا جاتا ہے۔ تاہم، یہ کوششیں اب مکمل طور پر ناکام ہو چکی ہیں۔ جبر خود اس حد تک ناقابلِ برداشت ہو چکا ہے کہ اسے مزید چھپایا نہیں جا سکتا۔ یہ ایک گہرے زخم کی مانند ہر فرد کے سامنے ریاستی بربریت کے ثبوت کے طور پر عیاں ہو چکا ہے۔ جس اجتماعی شعور کو توڑنے کے لیے اس ہتھیار کو استعمال کیا گیا، آج وہی اجتماعی شعور اس کے خلاف مزید مضبوط اور بیدار ہو رہا ہے۔ یوں جبری گمشدگیوں کی یہ پالیسی، اجتماعی مزاحمت کو کمزور کرنے کے بجائے، اس کی آبیاری اور تقویت کا سبب بن رہی ہے۔

بلوچستان کی نڈر آوازوں!

بیان میں کہا گیا کہ جبر کا سب سے بڑا دعویٰ یہ ہوتا ہے کہ وہ مزاحمت کو ختم کر سکتا ہے، لیکن بلوچستان نے اس دعوے کو بار بار جھوٹ ثابت کیا ہے۔

ہم نے بلوچستان میں اپنے آنکھوں سے دیکھا ہے کہ متاثرہ خاندان صرف متاثرین نہیں بلکہ مزاحمت کی پہلی صف ہیں ۔ مائیں جو سڑکوں پر کھڑی ہیں وہ ریاست کے جھوٹ کے خلاف زندہ احتجاج ہیں، بہنیں جو انصاف مانگتی ہیں وہ خاموشی کے نظام کو چیلنج کر رہی ہیں، بچے جو اپنے والد کے بارے میں سوال کرتے ہیں وہ ریاستی بیانیے کو توڑ رہے ہیں ،یہ وہ سیاسی حقیقت ہے جسے کوئی طاقت مٹا نہیں سکتی۔ جبری گمشدہ افراد کے لواحقین کا انتظار اب ایک سیاسی سوال میں بدل چکا ہے، جبر و تشدد سے ریاست حقائق کو مسخ تو کر سکتی ہے مگر وہ مزاحمت کو روک نہیں سکتی جو جبری گمشدہ افراد کے درد سے توانائی حاصل کر رہی ہےَ

فکری ساتھیوں!

بیان میں کہا گیا کہ ریاستی طاقت نے جبری گمشدگیوں کو چھپانے، ان کا جواز پیش کرنے اور ان کی سنگینی کو کم کرکے دکھانے کے لیے مختلف ادارے، کمیشن اور بیانیے تشکیل دیے، مگر یہ تمام کوششیں ایک گہری ناکامی سے دوچار ہو چکی ہیں۔ اس مسئلے پر قائم کی گئی بیانیہ سازی خود اپنے ہی بوجھ تلے منہدم ہو چکی ہے۔ جبری گمشدگیوں کے خلاف اٹھنے والی توانا آوازوں کو قید کرکے اور ان پر پابندیاں عائد کرکے ریاست خود اپنی بوکھلاہٹ اور بے بسی کا اظہار کر چکی ہے۔

یہ طرزِ عمل واضح کرتا ہے کہ ریاست کے پاس اس جرم کو جاری رکھنے کا نہ کوئی مضبوط قانونی جواز موجود ہے اور نہ ہی کوئی قابلِ دفاع سیاسی دلیل۔ مسئلہ محض چند ریاستی اداروں تک محدود نہیں، بلکہ یہ پورے اس نظام کا حصہ ہے جس کی تشکیل اور بقا میں جبر کو بنیادی حیثیت حاصل ہے۔ اسی لیے یہ نظام انتہائی سفاکی کے ساتھ اس پالیسی پر قائم ہے، کیونکہ اس کے پاس ہماری سرزمین کے وسائل پر قبضے، استحصال اور لوٹ مار کو جاری رکھنے کا کوئی دوسرا راستہ موجود نہیں۔

با شعور بلوچ عوام

بیان میں 8 جون ہمیں یہ سکھاتا ہے کہ خاموشی غیر جانبداری نہیں بلکہ جبر کے ساتھ شراکت داری ہے۔ آج ہر فرد پر یہ ذمہ داری عائد ہوتی ہے کہ وہ جبری گمشدگی کے خلاف آواز اٹھائے، متاثرہ خاندانوں کے ساتھ کھڑا ہو ،ریاستی جبر کو بے نقاب کرے، اور اس سیاسی نظام کو چیلنج کرے جو خوف پر قائم ہے۔ ہمیں اس مسئلے کے خلاف یکجاں ہوکر توانا فکری اور عملی جدوجہد کی ضرورت ہے کیونکہ جو قوم اپنے لاپتہ افراد کے لیے نہیں بولتی، وہ اپنے مستقبل کے لیے بھی خاموشی قبول کر لیتی ہے۔

بیان کے اختتام پر بلوچ عوام سے اپیل کی ہے آئیے، ہم سب مل کر اپنی توانا آوازوں سے اس غافل اور جابر نظام کو للکاریں اور یہ واضح پیغام پہنچائیں کہ جبری گمشدگی ایک ناقابلِ قبول جرم ہے۔ اس ریاستی جبر کو کسی بھی صورت نارملائز نہیں بنایا جا سکتا۔ بلوچ قوم اپنے اسیران اور لاپتہ افراد کو بھولنے کے لیے تیار نہیں، اور نہ ہی ان کی بازیابی کے لیے جاری جدوجہد سے دستبردار ہوگی۔ ان کی رہائی اور واپسی کے لیے یہ جدوجہد اب ایک اجتماعی عہد بن چکی ہے، جو اس وقت تک جاری رہے گی جب تک ہر لاپتہ فرد اپنے خاندان اور اپنے لوگوں کے درمیان واپس نہیں آ جاتا۔