ماہ رنگ بلوچ اور ساتھیوں کو عمرقید دینا ظلم ہے، اقوام متحدہ فوری نوٹس لے: الطاف حسین

ماہ رنگ بلوچ اور ساتھیوں کو عمرقید دینا ظلم ہے، اقوام متحدہ فوری نوٹس لے: الطاف حسین

بلوچ یکجہتی کمیٹی کی سربراہ ڈاکٹر ماہ رنگ بلوچ، بزرگ رہنما صبغت اللہ بلوچ اور ان کے ساتھیوں کو دی گئی عمرقید کی سزا کی شدید مذمت کرتا ہوں۔

بانی متحدہ قومی موومنٹ الطاف حسین نے سوشل میڈیا پر خطاب کرتے ہوئے کہا ہے کہ بلوچ یکجہتی کمیٹی کی سربراہ ڈاکٹر ماہ رنگ بلوچ، بزرگ رہنما صبغت اللہ بلوچ اور ان کے ساتھیوں کو دی گئی عمرقید کی سزا کی شدید مذمت کرتا ہوں۔ میں اقوام متحدہ کے سیکریٹری جنرل انٹونیو گٹرس سے اپیل کرتا ہوں کہ وہ ماہ رنگ بلوچ اور ان کے ساتھیوں کو دی گئی سزا کا فوری نوٹس لیں اور اس سزا کے خاتمے کے لیے پاکستان پر دباؤ ڈالیں۔

لاپتہ بلوچوں کی بازیابی کے لیے پہلے انسانی حقوق کے بلوچ رہنما ماما قدیر ملک بھر میں پیدل لانگ مارچ کرتے رہے۔ وہ لانگ مارچ کرتے ہوئے کئی بار اسلام آباد بھی گئے لیکن ان کی فریادیں نہ سنی گئیں۔ پھر بلوچ یکجہتی کمیٹی قائم ہوئی اور ڈاکٹر ماہ رنگ بلوچ سامنے آئیں۔ انہوں نے لاپتہ بلوچوں کی بازیابی کے لیے پرامن مظاہرے، جلسے جلوس کیے۔ ماہ رنگ بلوچ لاپتہ بلوچوں کی بازیابی کے لیے ماؤں، بہنوں اور بچوں کو لے کر کئی بار اسلام آباد آئیں لیکن حکمرانوں نے ان کی بات سننے کے بجائے پولیس کے ذریعے ان پر حملے کیے، گرفتاریاں کیں اور انہیں تشدد کا نشانہ بنا کر اسلام آباد سے نکال دیا۔

انہوں نے کہا کہ اس ظلم کے ذریعے مظلوم بلوچوں کو یہ پیغام دیا گیا کہ آپ کو اسلام آباد آ کر مظاہرہ کرنے کا کوئی حق نہیں۔ لاپتہ بلوچوں کی بازیابی کے لیے جدوجہد کرنے کی پاداش میں ماہ رنگ بلوچ اور ان کی ساتھی بلوچ خواتین اور بزرگوں کو کئی بار ایم پی او کے تحت جیل میں نظر بند کیا گیا، پھر انہیں جھوٹے مقدمے میں ملوث کردیا گیا اور اب انہیں خصوصی عدالت سے عمرقید کی سزا دے دی گئی ہے۔

الطاف حسین نے سوال کیا کہ آخر قوم کی اس بیٹی ماہ رنگ بلوچ کا کیا گناہ تھا؟ اس نے کون سا جرم کیا تھا کہ اسے عمرقید کی سزا دی گئی ہے؟ کیا ماہ رنگ بلوچ نے ریاست کے خلاف بندوق اٹھائی تھی؟ کیا ماہ رنگ بلوچ نے فوج سے دوبدو لڑائی کی تھی؟ وہ تو پرامن جدوجہد کر رہی تھیں، پھر انہیں کس جرم میں سزا دی گئی ہے؟

انہوں نے اس سزا کی شدید مذمت کرتے ہوئے کہا کہ اس کے انتہائی منفی اثرات مرتب ہوں گے، بلوچوں کی مزاحمت شدید اور جدوجہد مزید تیز ہو جائے گی۔ بلوچوں پر کئی دہائیوں سے مظالم ہو رہے ہیں، پشتونوں پر مظالم ہو رہے ہیں، مہاجروں پر مظالم ہو رہے ہیں، کشمیریوں اور دیگر قوموں پر مظالم ہو رہے ہیں، ایسے مظالم سے ملک قائم نہیں رہتے۔

انہوں نے اقوام متحدہ کے سیکریٹری جنرل انٹونیو گٹرس سے پرزور اپیل کی کہ وہ ماہ رنگ بلوچ اور ان کے ساتھیوں کو دی گئی اس سزا کا فوری نوٹس لیں اور اس سزا کے خاتمے کے لیے پاکستان پر دباؤ ڈالیں اور ظلم بند کرائیں۔