بلوچ اسٹوڈنٹس فرنٹ کے قائم مقام چیئرمین فضل بلوچ کزن سمیت لاپتہ

بلوچ اسٹوڈنٹس فرنٹ کے قائم مقام چیئرمین فضل بلوچ کزن سمیت لاپتہ

خاندانی ذرائع کے مطابق، 17 جولائی 2026ء کی رات ایک بجے سی ٹی ڈی، پولیس، لیڈیز کانسٹیبلز اور سادہ لباس میں ملبوس چند افراد پر مشتمل پاکستانی اہلکاروں نے بلوچستان کے صنعتی شہر حب چوکی کے علاقے امیر آباد میں ایک گھر پر چھاپہ مارا، اور بلوچ اسٹوڈنٹس فرنٹ کے قائم مقام چیئرمین کو ان کے کزن سمیت حراست میں لے کر نامعلوم مقام پر منتقل کر دیا۔

لاپتہ ہونے والے قائم مقام چیئرمین فضل بلوچ ولد دوست محمد بنیادی طور پر ضلع آواران کے رہائشی ہیں اور حب چوکی میں ایک نجی استاد کے طور پر تعلیمی و تدریسی خدمات سرانجام دے رہے تھے۔ دوسری جانب ان کے کزن صدام حسین ولد نبی بخش پیشے کے لحاظ سے ایک کاروباری نوجوان ہیں۔ ذرائع کے مطابق، صدام حسین اس واقعے سے محض ایک روز قبل ہی آواران سے حب چوکی آئے تھے اور چھاپے کے دوران انہیں بھی چیئرمین فضل بلوچ کے ہمراہ غیر آئینی طور پر جبری گمشدگی کا نشانہ بنایا گیا۔

بلوچ اسٹوڈنٹس فرنٹ اور لاپتہ نوجوانوں کے لواحقین نے حکومتِ وقت، اعلیٰ عدلیہ اور متعلقہ اداروں سے مطالبہ کیا ہے کہ چیئرمین فضل بلوچ اور صدام حسین کو فوری طور پر بازیاب کیا جائے۔ اگر ان پر کوئی الزام ہے، تو ملکی آئین اور قانون کو مدنظر رکھتے ہوئے انہیں عدالت میں پیش کر کے قانونی کارروائی کی جائے۔

تنظیم اور لواحقین کے مطابق، اس طرح غیر آئینی طور پر بلوچ نوجوان، طلبہ اور سیاسی کارکناں کو جبری لاپتہ کرنا اور پھر ان کی حراست سے انکار کرنا نہ صرف خاندانوں کو شدید ذہنی کرب میں مبتلا کرتا ہے، بلکہ یہ معاشرے میں خوف و ہراس پھیلانے اور پوری بلوچ قوم کے مستقبل سے کھیلنے کے مترادف ہے۔